Xəbərlər

           Bakı Ali Neft Məktəbi (BANM) , Azərbaycan Dillər Universiteti və “Camping Azerbaijan”ın təşkilatı dəstəyi ilə “İnkişaf Zamanı” proqramı çərçivəsində “EcoChange” layihəsi təşkil olunmuşdur. BANM-də baş tutan tədbirdə Ali məktəbin tələbələri və digər universitetlərdən olan tələbələr iştirak ediblər. “EcoChange” layihəsinin keçirilməsində əsas məqsəd insanların ekoloji problemlərə biganə yanaşmasının qarşısını almaqdır. Layihənin BANM tərəfindən olan təşkilatçısı 4-cü kurs Kimya Mühəndisliyi üzrə təhsil alan Ruslan Həşimzadə  olub.

 

           Tədbir zamanı "Yaşıl Tikinti" şirkətinin direktoru Fuad Bağırov və şirkətin əməkdaşı Rövşanə Babayeva iştirakçılara  ekoloji problemlərlə bağlı maarifləndirici  təlim keçiblər. Təlim zamanı binalarda havasızlıq, plastik stəkanların həddindən artıq istifadəsinin hansı böyük və ciddi ekoloji problemlərə gətirib çıxarması və digər bu istiqamətdə mövzulara toxunulub.

 

           Qeyd edək ki, Ali Məktəb ətraf mühitin mühafizəsi, ekologiya ilə bağlı məsələrə hər zaman böyük önəm verib və bu istiqamətdə olan proqramları dəstəkləyib. Təsadüfi deyil ki, BANM-in inteqrasiya edilmiş idarəetmə sistemləri üzrə siyasətində rəhbər tutulan standartlardan biri də ISO 14001 – yəni ətraf mühitin idarə olunmasına dair tələbləri əks etdirən sənəddir.