Xəbərlər
SOCAR-ın Bakı Ali Neft Məktəbinin rektoru Elmar Qasımovun 31 Dekabr - Dünya Azərbaycanlılarının Həmrəyliyi Günü və Yeni il münasibəti ilə təbriki:
Əziz dostlar və BANM ailəsi,
Yola salmaqda olduğumuz 2022-ci il dünya və ölkəmiz üçün əhəmiyyətli hadisələrlə yadda qaldı. Tariximizə “Şuşa ili” kimi yazılan bu ildə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Qəhrəman Azərbaycan Ordusunun işğaldan azad etdiyi torpaqlarımızda genişmiqyaslı yenidənqurma və quruculuq işləri sürətlə davam etdi.
2022-ci il SOCAR-ın Bakı Ali Neft Məktəbi üçün də yaddaqalan il oldu. Bu il də Ali Məktəbimiz peşəkar, yüksək intellektə malik ingilisdilli kadr hazırlığı missiyasını şərəflə davam etdirərək bir çox uğurlara imza atdı. Yola saldığımız ildə də yüksək göstəricilərimizlə, tələbələrimizin ölkə və beynəlxalq səviyyəli yarışlarda əldə etdiyi uğurlarla fərqlənə bildik. Qəbul imtahanlarında əldə etdiyimiz yüksək nəticələri qoruduq. Ən yüksək keçid balı göstəricilərinə görə yenə ölkə birincisi ünvanını qazandıq. Ölkə üzrə ən yüksək keçid balına malik 5 ixtisasın 4-ü bizim Ali Məktəbimizin ixtisasları oldu. Bu il ölkə üzrə Prezident təqaüdünə layiq görülən 102 nəfərin 31-i BANM tələbəsidir və biz yenə də bu göstəriciyə görə Azərbaycan ali təhsil müəssisələri arasında birinciyik. Ali Məktəbimiz Azərbaycanda ilk dəfə keçirilən “Teknofest”də Azərbaycan universitetləri arasında finalda ən çox komanda ilə təmsil olunaraq 2-si qızıl olmaqla 8 medal qazandı. BANM-in tələbələri ölkəmizi NASA-nın nüfuzlu müsabiqəsində ilk dəfə təmsil etdilər, eyni zamanda müxtəlif müsabiqələrdə tələbələrimiz yüksək uğurlar qazandılar. Builki məzunlarımızın da əksəriyyəti dünyanın nüfuzlu şirkətlərdə çalışır, bir qismi isə tam təqaüdlü təhsillərinə davam edirlər. Bütün bunlar bizim üçün böyük qürur və fəxarətdir.
Bu il 11 illiyini qeyd etdiyimiz Ali Məktəbimizin maddi-texniki bazası daha da gücləndirildi, yeni laboratoriyalar istifadəyə verildi.
Əldə olunan hər bir uğur böyük zəhmətin bəhrəsidir. Uğurlarımızda payı olan hər kəsə təşəkkür edirəm.
Qarşıdan gələn 31 Dekabr - Dünya Azərbaycanlılarının Həmrəylik Günü və Yeni il münasibəti ilə Sizi və ailənizi ürəkdən təbrik edir, hər birinizə möhkəm cansağlığı, xoşbəxtlik və firavanlıq arzulayıram!
Bayramlarınız mübarək!