Tələbə həyatı

Neft Mühəndisləri Cəmiyyəti

Ali Məktəbdə fəaliyyət göstərən Neft Mühəndisləri Cəmiyyətinin əsas məqsədi tələbələrin müxtəlif yönlərdə inkişafını, onlar arasında təcrübə və bilgi mübadiləsini təmin etmək, ayrı-ayrı sənaye sahələrində çalışan peşəkarlarla görüşlər təşkil etmək və onların real iş prinsipləri ilə əyani tanışlığına nail olmaqdır. Cəmiyyət texniki və qeyri-texniki sessiyalar, yarışlar kimi müxtəlif maarifləndirici tədbirlər, eləcə də tələbələrin real iş prosesi ilə yaxından tanış olmaları üçün zavodlara və iş sahələrinə ekskursiyalar təşkil edir, xeyriyyə aksiyaları həyata keçirir, daim yeni layihələr üzərində işləyir.

Neft-qaz mühəndisliyi və Kimya mühəndisliyi ixtisaslarının tələbələri üçün “Engineering Academy” və “Design School” adlı böyük miqyaslı layihələr məhz Neft Mühəndisləri Cəmiyyəti tərəfindən həyata keçirilib. Cəmiyyətin təşkil etdiyi çoxsaylı tədbirlər könüllü tələbələrin komanda şəklində fəaliyyəti nəticəsində reallaşıb. Müxtəlif şirkətlərdə işləyən peşəkar mühəndislər və BANM-in məzun və tələbələrinin mentorluğu ilə gerçəkləşən tədbirlər digər universitetlərin tələbələrinin də böyük marağına səbəb olub.

Cəmiyyət fəaliyyət illəri ərzində göstərdiyi yüksək performansa görə 2018-ci ildə “Gold Standard Chapter”, 2019-cu ildə isə “Student Chapter Excellence Award” mükafatlarına layiq görülüb.