Xəbərlər
BANM inkişafı və innovasiyaları təşviq etmək üçün aparıcı QHT-lərlə əməkdaşlığı gücləndirir
Bakı Ali Neft Məktəbi (BANM) inkişafı və innovasiyaları təşviq etmək üçün aparıcı qeyri-hökumət təşkilatları (QHT) ilə əməkdaşlığı gücləndirməkdə davam edir. Bu tərəfdaşlıqlar vasitəsilə BANM davamlı inkişafı dəstəkləmək, təhsil imkanlarını artırmaq və icmanın inkişafı təşəbbüslərinə töhfə vermək məqsədi daşıyır.
Bakı Ali Neft Məktəbində narkomaniyaya qarşı mübarizə mövzusunda maarifləndirici seminar keçirilib. Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının baş məsləhətçisi Vasif Quliyev və “Gənclərin Anti-Narkomaniya” İctimai Birliyinin sədri Büllur Məmmədova seminarda çıxış ediblər. Onlar narkomaniyaya və gənclər arasında psixotrop maddələrin yayılmasına qarşı mübarizədə hər kəsi fəal olmağa çağırıblar.
“Gənclər üçün Təhsil Mərkəzi” Bakı Ali Neft Məktəbində Tələbələrin İctimai Dinləmə Platforması çərçivəsində tələbələrlə görüş təşkil edib. Cümhuriyyət tarixinin ən yaxşı biliciləri və tədqiqatçılarından olan professorlar Qulu Məhərrəmli və Ədalət Tahirzadə tələbələrimizə tarixin təfərrüatlarını böyük həvəslə çatdırdılar. Bu şərəfli tarixi bilmək, dərk etmək və dəyərləndirmək layiqli insan və məsuliyyətli vətəndaş olmaq üçün zəmin yaradır.
Azərbaycan Respublikası Gənclər Təşkilatları Milli Şurası (NAYORA) Bakı Ali Neft Məktəbində (BANM) “Gənc Səfirlər” proqramını təqdim edib. Azərbaycan Respublikası Gənclər və İdman Nazirliyinin təşkilati dəstəyi ilə həyata keçirilən proqram Azərbaycanı beynəlxalq aləmdə layiqincə təmsil etməyə qadir və layiqli gənclərdən ibarət xüsusi qrup formalaşdırmaq məqsədi daşıyır.
BANM-in 100-ə yaxın bakalavrının toplaşdığı görüşdə Gənc Səfirlər Proqramının rəhbəri, NAYORA-nın beynəlxalq əlaqələr üzrə katibi İlhamə Qasımzadə təqdimatla çıxış edib. Əvvəlcə proqramla bağlı videoçarx nümayiş olunub. İlhamə Qasımzadə layihənin məqsədləri, vəzifələri, strategiyası və iştirak qaydaları haqqında məlumat verib. Onun sözlərinə görə, proqramda iştirak edən Ali Məktəbin tələbələri ölkənin siyasi, sosial, iqtisadi və mədəni həyatı haqqında daha dərin biliklərə yiyələnəcəklər.
“Student Cooperation” qeyri-hökumət təşkilatı info sessiya keçirilib. Sessiyada 132 tələbə iştirak etmişdir. Onlara quruma üzvlük prosesi, könüllülüyün üstünlükləri, gələcək layihələr, beynəlxalq əməkdaşlıq və bu istiqamətdə həyata keçirilən işlər barədə məlumat verilib. Tələbələr arasında əyləncəli və interaktiv oyunlar keçirildi.
Bakı Ali Neft Məktəbində “Debat Klubu”nun təşkilatçılığı və “Vətəndaş Cəmiyyətində Debat” İctimai Birliyinin dəstəyi ilə “Debat Məktəbi”adlı təlim keçirilib. 4 günlük təlimdə “Vətəndaş Cəmiyyətində Debat” İctimai Birliyinin peşəkar təlimçiləri tələbələrə debatın qayda və prinsipləri və onun əhəmiyyəti haqqında məlumat veriblər. İnteraktiv təlimin sonunda fəal tələbələr xüsusi sertifikatlarla təltif olunublar.
