Xəbərlər

Bakı Ali Neft Məktəbi ilə Daşkənd Kimya Texnologiya İnstitutu arasında əməkdaşlıq müzakirə olunub

Özbəkistanın Daşkənd Kimya Texnologiya İnstitutunun rektoru Botir Usmonovun rəhbərlik etdiyi nümayəndə heyəti SOCAR-ın Bakı Ali Neft Məktəbində (BANM) olub.

Rektor Elmar Qasımov qonaqlara Bakı Ali Neft Məktəbi haqqında ətraflı məlumat verib.  Bildirib ki, rəhbərlik etdiyi Ali Məktəblə Özbəkistanın Daşkənd Kimya Texnologiya İnstitutu arasında münasibətlər yüksək səviyyədədir və bu görüş münasibətlərin inkişafı üçün növbəti uğurlu addımdır.

Bakı Ali Neft Məktəbində yaradılan şəraiti yüksək qiymətləndirən Daşkənd Kimya Texnologiya İnstitutunun rektoru Botir Usmonov buradakı təcrübədən yararlanmaq istədiklərini qeyd edib. Rektor həmçinin mayda Özbəkistanda keçirilən Hakatona BANM-in tələbə və əməkdaşlarını dəvət edib.

Görüşdə magistratura səviyyəsində ikili diplom proqramının həyata keçirilməsi, tələbə mübadiləsinin aparılması, həmçinin yay məktəblərinin təşkil edilməsi  ilə bağlı əməkdaşlıq imkanları müzakirə olunub.