Xəbərlər

Bakı Ali Neft Məktəbində şəhid müəllimin xatirəsinə həsr olunmuş bilik yarışının qalibləri mükafatlandırılıb

SOCAR-ın Bakı Ali Neft Məktəbində şəhid biologiya müəllimi Tural Rəhimovun xatirəsinə həsr olunmuş VII-VIII siniflər arasında biologiya fənni üzrə keçirilən bilik yarışının mükafatlandırma mərasimi təşkil olunub.

Tədbirdə şəhidin ailə üzvləri, Cəlilabad Rayon İcra Hakimiyyəti, Müdafiə Nazirliyinin nümayəndəsi, qazi müəllimlər, məktəb direktorları, qalib şagirdlərin müəllimləri, valideynlər və digər qonaqlar iştirak ediblər.

Mərasim Azərbaycan Respublikasının Dövlət Himninin səsləndirilməsi və şəhidlərin xatirəsinin 1 dəqiqəlik sükutla yad edilməsi ilə başlayıb. Sonra şəhid haqqında qısa film nümayiş olunub.

Tədbiri giriş sözü ilə açan bilik yarışının təşkilatçısı “Global Olympic Center”in direktoru Xəyal İbrahimzadə iştirakçıları salamlayaraq tədbirə göstərilən dəstəyə görə təşəkkürünü bildirib. O, belə layihələrin davamlı olacağını qeyd edib.

Sonra çıxış edən şəhid atası Arif Rəhimov təşkilatçılara minnətdarlığını bildirib və övladının elmə həvəsindən, vətənə bağlılığından söhbət açıb. Şəhid atası qalib şagirdlərə Tural kimi daim vətən eşqi ilə yaşamalarını, ölkəmizi bilikləri ilə daha da irəli aparmalarını arzulayıb.

Bakı Ali Neft Məktəbinin rektoru Elmar Qasımov çıxışında şəhidin ruhuna ehtiramını bildirərək onun xatirəsinin Ali Məktəbdə yad edilməsindən və müxtəlif bölgələrdən  gələn şagirdlərin mükafatlandırılmasından məmnunluğunu ifadə edib. O, şəhidin xatirəsinə həsr olunan bilik yarışının hər il təşkil edilməsini və BANM-də keçirilməsini təklif edib.

Daha sonra tədbir digər qonaqların çıxışları ilə davam edib. Çıxışlardan sonra qaliblərin mükafatdırılması başlayıb və onlara müxtəlif mükafatlar, həmçinin şəhidin xatirəsinə xüsusi olaraq hazırlanmış medal, köynək təqdim olunub.