Xəbərlər

SOCAR-ın Bakı Ali Neft Məktəbində 20 Yanvar şəhidləri anılıb

SOCAR-ın Bakı Ali Neft Məktəbində (BANM) 20 Yanvar faciəsinin 33-cü ildönümünə həsr olunmuş anım tədbiri keçirilib.

Tədbirdən öncə Ali Məktəbin kollektivi Şəhidlər Xiyabanını ziyarət edib, şəhidlərin məzarları üstünə gül dəstələri düzüblər.

BANM-in kampusunda keçirilən tədbirdə əvvəlcə faciə qurbanlarının xatirəsi bir dəqiqəlik sükutla yad edilib, Dövlət Himni səsləndirilib.

Tədbirin açılışında Bakı Ali Neft Məktəbinin prorektoru Oqtay Rzayev çıxış edərək 1990-cı il yanvar ayının 19-dan 20-nə keçən gecə baş vermiş qanlı faciədən, 20 Yanvar hadisələrinin müstəqillik uğrunda mübarizədə oynadığı roldan bəhs edib. O qeyd edib ki, bu hadisə Azərbaycan xalqının mübarizliyinin, məğrurluğunun göstəricisi, qəhrəmanlıq salnaməsidir. BANM-in prorektoru xalqımıza qarşı törədilən bu hadisənin Azərbaycan xalqının qan yaddaşı olduğunu, ölkənin müstəqilliyi, suverenliyi, azadlığı uğrunda canlarını qurban vermiş şəhidlərin adlarının əbədi olaraq tariximizə və xalqımızın yaddaşına həkk edildiyini bildirib.

Tədbirdə çıxış edən 20 Yanvar İctimai Birliyinin Xətai rayon təşkilatının sədri Şakir Azadəliyev hadisənin şahidi kimi həmin gün yaşadıqlarından danışıb. O qeyd edib ki, 20 Yanvar Azərbaycan xalqının qəhrəmanlığını nümayiş etdirdiyi gündür və bu hadisələr Azərbaycan xalqının müstəqillik uğrunda mübarizə əzmini qıra bilmədi, Sovet ordusunun törətdiyi bu qanlı cinayət SSRİ-nin süqutunu daha da sürətləndirdi. Bununla Azərbaycanda müstəqillik hərəkatı daha geniş vüsət aldı.

20 Yanvar əlili Sahib Əlizadə həmin gecə baş verən hadisələrdən danışıb, xatirələrini bölüşüb. O qeyd edib ki, 20 Yanvar hadisələri milli birlik və əzmkarlıq salnaməsidir, Azərbaycan xalqı Sovet qoşunlarına qarşı əsl birlik, qəhrəmanlıq nümayiş etdirdi. 20 Yanvar əlili gənclərə səslənərək xalqımızın başına gətirilən faciələri unutmamağı, tariximizi dərindən öyrənməyi tövsiyə edib.

Tədbirin sonunda “20 Yanvar: Danışan talelər” sənədli filmi nümayiş olunub.

#SOCAR #BANM #BHOS #20Yanvar #ŞəhidlərXiyabanı #ŞəhidlərimizəEhtiramla #ŞəhidlərÖlməz