Xəbərlər

Bakı Ali Neft Məktəbində olimpiada qalibləri mükafatlandırıldı 

Bakı Ali Neft Məktəbində “Global Olimpic Center”in təşkilatçılığı ilə ABŞ-nin Kopernik olimpiadasının riyaziyyat üzrə Azərbaycan mərhələsinin qalibləri mükafatlandırılıb. 

Mükafatlandırma mərasimi Azərbaycanın Dövlət Himni və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.  Giriş sözü ilə “Global Olimpic Center”in direktoru Xəyal İbrahimzadə tədbiri açıq elan edib. Sonra şagirdləri və valideynləri salamlayan Bakı Ali Neft Məktəbinin rektoru Elmar Qasımov onları təbrik edib, uğurlar arzulayıb. Bildirib ki, BANM ölkədə təhsilin inkişafına hər cür dəstək verməyə hazırdır. Rektor rəhbərlik etdiyi Ali Məktəblə bağlı tədbir iştirakçılarına geniş məlumat verib. Daha sonra Kopernik olimpiadasının direktor müavini Maria Pedro qonaqları Azərbaycan dilində salamlayaraq, maraqlı diskusiya ilə çıxışına davam edib. Ölkəmizdə ilk dəfə olan nümayəndə iştirakçılara qlobal turda uğurlar arzulayıb. 

Çıxışlardan sonra mükafatlandırma mərasimi başlayıb.  İlk olaraq qızıl medal qazananlara rektor Elmar Qasımov medalları təqdim edib. Gümüş və bürünc mükafatları isə qaliblərə dəvət olunmuş digər qonaqlar verib. Fizika və astronmiya, təbiət elmləri üzrə qaliblərə isə “Tərrəqi” medallı bioloq Camal Kərimov mükafatları təqdim edib.

Yeri gəlmişkən 800 şagird arasında təşkil edilən olimpiadanın 386 nəfəri qalib adını qazanıb. Mükafatlandırılan fiziklər artıq ABŞ-də Rice universitetində təşkil olunan qlobal turda ölkəmizi təmsil edirlər. Onlar eyni zamanda NASA-da olacaq, oradakı iş prosesi və raketlərlə tanış olacaqlar. Riyaziyyatçılar isə iyulun 10-da ABŞ-də MIT-də və Kolumbiya univeristetində təşkil olunacaq qlobal turuda ölkəmizi təmsil edəcəklər.