Xəbərlər

Bakı Ali Neft Məktəbinin (BANM) "Neft- qaz mühəndisliyi" və "Kimya mühəndisliyi"  ixtisası üzrə təhsil alan III kurs tələbələri Ümid Tərlanlı,Ramil Məmişov, Nərgiz Tarverdiyeva 26-31 iyul tarixlərində "Schlumberger" şirkətinin təşkil etdiyi yay məktəbində iştirak ediblər.

 

Nəzəri və təcrübi hissələrdən ibarət olan yay məktəbi "Schlumberger" şirkətinin Azərbaycan üzrə baş meneceri Vil Qreysin müşayiəti ilə təşkil olunub. Günün birinci yarısında keçirilən nəzəri hissədə tələbələrə Vil Qreys və şirkətin digər aparıcı mütəxəssisləri tərəfindən müxtəlif mövzularda mühazirələr, təqdimatlar keçirilib və şirkətin müxtəlif iş sahələrində gedən prosesləri haqqında məlumat verilib. Vil Qreys tələbələrlə görüş zamanı onlara şirkətin fəaliyyəti və neft sənayesində təqdim etdiyi xidmətləri haqqında ətraflı məlumat verib.

 

Günün ikinci yarısında isə, tələbələrə nəzəri hissədə verilən biliklərin təcrübədə tətbiqinin göstərilməsi üçün geoloji əraziyə, Yanar dağa, qazma simulyasiya mərkəzinə və iş sahələrinə səfərlər, həmçinin quyuların qazılmasında istifadə olunan müasir cihaz və qurğularla, onların istifadə qaydaları ilə əyani tanışlıq təşkil olunub. Bundan başqa, tələbələrin asudə vaxtlarının səmərəli və əyləncəli təşkil olunması üçün onlara layihələr təqdim olunub və komanda oyunları keçirilib.

Həftə sonunda isə, tələbələr onlara tapşırılan layihələrin təqdimatını uğurla həyata keçiriblər. Sonda yay məktəbini müvəffəqiyyətlə başa vurmuş tələbələrə  "Schlumberger"  şirkətinin Azərbaycan üzrə baş meneceri Vil Qreys tərəfindən sertifikatlar təqdim olunub.