Xəbərlər

       Bakı Ali Neft Məktəbində (BANM) Dövlət Bayrağı Gününə həsr edilmiş tədbir keçirilib. Tədbirdə BANM-ın professor-müəllim heyəti və tələbələri iştirak edib. Görüşü öz çıxışı ilə açan Ali Məktəbin İnzibati-təsərrüfat işləri üzrə prorektoru Oqtay Rzayev tədbir iştirakçılarına ölkədə qeyd edilən bu günün – 9 noyabrın önəmliliyindən danışıb və  dövlət bayrağının  100 illik tarixə malik Cümhuriyyətimizin rəmzi olduğunu bildirib.

 

       Tədbirdə həmçinin çıxış edən Ali Məktəbin  İngilis dili və humanitar fənlər mərkəzinin dosenti, Tarix üzrə fəlsəfə doktoru Ələmdar Şahverdiyev dövlət bayrağının tarixindən və bugünki nüfuzundan danışaraq “Türk ənənəsində vətən və bayraq anlayışı” mövzusunda təqdimatla tədbir iştirakçıları qarşısında çıxış edib.

 

      Daha sonra BANM-ın “Kimya mühəndisliyi” ixtisasının III kurs tələbələri bu mövzuda hazırladıqları təqdimatları tədbir iştirakçılarına məruzə ediblər. Ağaqardaş Camalovun “Tarixi Azərbaycan bayraqları”, Rəşid Abbasovun “Xanlıqlar dövründən 1918-ci ilə qədər olan bayraqlar”, Elnur Rəsulovun isə “1918-ci ildən bu günə qədər olan bayraqlar” mövzusunda hazırladıqları təqdimatlar böyük maraqla qarşılanıb.