Xəbərlər

SOCAR-ın Bakı Ali Neft Məktəbində (BANM) FİSO Olimpiadasının riyaziyyat və ingilis dilləri üzrə Azərbaycan seçim turunun mükafatlandırma mərasimi keçirilib.

Azərbaycanın müxtəlif bölgələrindən şagirdlərin iştirak etdiyi tədbirdə “Global Olympiad Center”in (GOC) direktoru Xəyal İbrahimzadə iştirakçıları salamlayaraq tədbirin mükafatlandırma ilə yanaşı, gələcəyin parlaq ulduzlarını təbrik etmək və onlara dəstək  olmaq  baxımından da əhəmiyyətini vurğulayıb.

Bakı Ali Neft Məktəbinin rektoru Elmar Qasımov rəhbərlik etdiyi ali təhsil müəssisəsinin belə əhəmiyyətli tədbirin ev sahibi olmasından məmnunluğunu ifadə edərək şagirdləri təbrik edib və onlara FİSO-nun final mərhələsində uğurlar arzulayıb. Şagirdlərin səylərini yüksək qiymətləndirən rektor bu yarışda göstərdikləri bacarıq və həvəs ilə nümunə olduqlarını bildirib.

Tədbir şagirdlərin müxtəlif kateqoriyalarda əldə etdikləri medallarla mükafatlandırılması ilə davam etdirilib.

Qeyd edək ki, FİSO Olimpiadasının final mərhələsi bu il Birləşmiş Ərəb Əmirliklərinin (BƏƏ) Dubay şəhərində keçiriləcək. İyunun 22-26 tarixləri arasında təşkil ediləcək bu nüfuzlu tədbirdə, 36 ölkədən gələn iştirakçılar bilik və bacarıqlarını nümayiş etdirəcəklər.