Xəbərlər

Bakı Ali Neft Məktəbində yeni tədris ilinə start verildi

SOCAR-ın Bakı Ali Neft Məktəbinin (BANM) rektoru Elmar Qasımov 2023/2024-cü tədris ili və qarşıdakı planlarla bağlı Ali Məktəbin əməkdaşları və professor-müəllim heyəti ilə görüşüb.

Rektor BANM-in bu tədris ilinin də uğurlu olacağını, yüksək bal toplayan abituriyentlərin Bakı Ali Neft Məktəbini seçdiyini və qəbul planının tam dolduğunu vurğulayıb. O qeyd edib ki, bu il də ən yüksək keçid balına görə BANM liderdir, ölkə üzrə ən yüksək keçid balı olan 4 ixtisasın 3-ü Ali Məktəbin ixtisaslarıdır: “Əldə olunan nəticələr Ali Məktəbimizə böyük marağın, bu illər ərzində qazandığımız etibarın, nüfuzumuzun göstəricisidir. Hər il olduğu kimi ötən tədris ilinin məzunlarının da nəticələri uğurludur. Məzunlarımızın əksəriyyəti SOCAR-da və digər böyük şirkətlərdə işlə təmin olunub, bir qismi dünyanın nüfuzlu universitetlərinə qəbul olub, təqaüd qazanaraq, təhsillərini davam etdirirlər. Bu il Xaricdə Təhsil üzrə Dövlət Proqramını qazananların sayında da Bakı Ali Neft Məktəbinin məzunları üstünlük təşkil edir. Sevindirici haldır ki, tələbələrimiz, məzunlarımız yüksək bilik və bacarıqlarına görə seçilirlər. Bu, həm də bizim ötən müddət ərzində keyfiyyətimizi qorumağı bacardığımızın göstəricisidir”.

Rektor yeni tədris ilində nəzərdə tutulan planlardan da danışaraq qarşıda böyük hədəflərin olduğunu, beynəlxalq əməkdaşlığın genişləndiriləcəyini, həmçinin yerli universitetlərlə yeni proqramların həyata keçiriləcəyini qeyd edib.

Sonda bu il 50 illik yubileyi tamam olan İnzibati-təsərrüfat işləri üzrə prorektor Oktay Rzayev, Neft-qaz mühəndisliyi kafedrasının dosenti Xanum Cəfərova, Məşqçi-müəllim İftixar Məhərrəmov, Təsərrüfat sahəsi əməkdaşları Svetlana Məmmədova, Nərminə Hüsüyeva, 60 illik yubileyi qeyd olunan Tarixi araşdırmalar üzrə mütəxəssis Pərvin Ahənçi, bərpaçı-rəssam Elxan Əzizov, Təsərrüfat sahəsi əməkdaşı Sultan Zeynalov Fəxri fərman və Təşəkkürnamə ilə təltif ediliblər.

Həmçinin BANM kollektivi rektor Elmar Qasımovu 50 illik yubileyi münasibətilə təbrik edib, ona Fəxri plaket təqdim ediblər.