Xəbərlər

11 ilin mübarək, Bakı Ali Neft Məktəbi !

Bu gün Bakı Ali Neft Məktəbinin yaradılmasından 11 il ötür. Azərbaycan Prezidenti İlham Əliyevin 29 noyabr 2011-ci il tarixli Fərmanı ilə SOCAR-ın tərkibində yaradılan Ali Məktəbimizlə bağlı 11 faktı təqdim edirik:

1. Bakı Ali Neft Məktəbi tam ingilisdilli ali təhsil müəssisəsidir.

2. Bakı Ali Neft Məktəbinin kampusu Qafqaz regionunun ən böyük kampuslarından biridir. Onun açılışını 2017-ci il may ayının 1-də Prezident İlham Əliyev həyata keçirib.

3. BANM ilk qəbul aparılan ildə Dövlət İmtahan Mərkəzinin reytinq cədvəlində 51 ali təhsil müəssisəsi arasında lider kimi tarixə düşüb.

4. İlk ildə Ali Məktəbə cəmi iki ixtisas üzrə qəbul həyata keçirilib. Hazırda 6 ixtisas üzrə bakalavr, 3 mühəndislik ixtisası və MBA proqramı (4 istiqamət) üzrə magistratura, 3 ixtisas üzrə doktorantura və təkrar ali təhsilə qəbul aparılır.

5. Bakı Ali Neft Məktəbində tədris istehsalatla inteqrasiya şəklində həyata keçirilir. Hər il tələbələr müxtəlif müəssisələrdə istehsalat təcrübəsində olurlar.

6. Bakı Ali Neft Məktəbi Prezident təqaüdçülərinin sayına görə Azərbaycan təhsil tarixində rekorda imza atır. İki ildir ki, ölkə üzrə təqaüdə layiq görülən tələbələrin 1/3-i BANM tələbəsidir. 11 il ərzində isə təqaüdçülərin ümumi sayı 235 nəfər olub.

7. Bakı Ali Neft Məktəbi ən yüksək keçid balı ilə liderdir. 2022/2023-cü tədris ili üzrə ən yüksək keçid balı qeydə alınan ilk 5 ixtisasın 4-ü BANM-in ixtisasıdır.

8. Bu tədris ilində Bakı Ali Neft Məktəbinə qəbul olanların 73%-i 600-dən çox bal toplayıb.

9. Bakı Ali Neft Məktəbi müsabiqədənkənar qəbul olanların sayına görə də öndədir. Bu il qəbul olan olimpiada qaliblərinin sayı - 20 nəfər

10. Bakı Ali Neft Məktəbinin məzunlarının işlə təminolunma göstəricisi 100 %-dir.BANM məzunları SOCAR-da və müxtəlif transmilli şirkətlərdə, dövlət qurumlarında, nüfuzlu müəssisələrdə çalışırlar.

11. BANM tələbələri “Teknofest”, “NASA Herc”, “WorldSkills Asia” və digər beynəlxalq yarışlarda uğurla iştirak edirlər.

Gənc ali təhsil müəssisəsi olmasına baxmayaraq BANM böyük uğurlar qazanıb.

Qarşıdakı illərdə də hədəflərimizə nail olacağımıza, uğurlara imza atacağımıza əminik.

11 ilin mübarək, Bakı Ali Neft Məktəbi !

#SOCAR #BANM #BHOS #BizBirik #təbrik #aliməktəb #universitet #anniversary