Xəbərlər

   Bakı Ali Neft Məktəbində dünyanın aparıcı şirkətlərindən biri olan EBSCO-nun EBSCO Discovery Xidmətinin (EDX) istifadəsi üzrə təlim keçirilib. Təlimdə Ali Məktəbin professor-müəllim heyəti, tələbələri və Azərbaycan Kitabxana İnformasiya Konsorsiumunun nümayəndələri iştirak ediblər.

 

Təlimi EBSCO İnformasiya xidmətinin MDB ölkələri üzrə regional satış meneceri İrina Krejçarova keçirib. O, təqdimatında təlim iştirakçılarına EBSCO şirkəti, EDX- axtarış xidmətinin yeni imkanları, BANM-in timsalında EDX-də axtarışın aparılması, EDX və e-Kitabların inteqrasiyası haqqında ətraflı məlumat verib.

 

Qeyd edək ki, təlimin məqsədi - EDX-nin imkanlarından istifadə etməklə Ali Məktəbin tələbə, müəllim və tədqiqatçılarını onların dəyişən tələblərinə uyğun etibarlı mənbələrdən daxil olan informasiya ilə təmin etməkdir.

 

Xatırladaq ki, BANM və EBSCO şirkəti arasında imzalanmış müqaviləyə əsasən ali məktəbin tələbə, müəllim və əməkdaşları üçün EBSCO şirkətinin müxtəlif çeşidli məhsulları və xidmətləri haqqında davamlı olaraq təlimlər keçirilir.