Xəbərlər

Bakı Ali Neft Məktəbində I kurs tələbələri arasında futzal yarışları başlayıb

Ümummilli Lider Heydər Əliyevin anadan olmasının 100-cü ildönümünə həsr olunmuş idman yarışları çərçivəsində Bakı Ali Neft Məktəbinin (BANM) I kurs tələbələri arasında futzal yarışlarının açılış mərasimi keçirilib.

Yarışlarda I kurslar arasında ümumilikdə 9 komanda iştirak edir.

Açılış mərasimində çıxış edən BANM-in rektoru Elmar Qasımov tələbələrə yarışlarda uğurlar arzulayıb.  Rektor qeyd edib ki,  I kurs tələbələrinin təşkil edilən tədbirlərdə fəal iştirakı, bu yarışlara həvəslə qatılmaları təqdirəlayiq haldır: “Bu gün açılışını həyata keçirdiyimiz çempionat Ulu Öndər Heydər Əliyevə həsr edilib və ona ehtiramın əlamətidir. Sevindirici haldır ki, ali məktəb həyatına yenicə qədəm qoyan birinci kurs tələbələri yarışlara böyük həvəslə, maraqla qatılıblar. Bu dostluq yarışıdır və qazanan tələbələrimiz olacaq”.

Sonra oyunlara başlanılıb. İlk oyun “Qarabağ” və “Alpout” komandaları arasında baş tutub.