Xəbərlər

Bakı Ali Neft Məktəbinin müəllimlərinə “British Council” təşkilatının sertifikatları təqdim olundu

Bakı Ali Neft Məktəbinin (BANM) İngilis dili və Humanitar fənlər Mərkəzinin “British Council” təşkilatının təşkil etdiyi təlim kursunu uğurla başa çatdıran müəllimlərinə sertifikatlar təqdim edilib.

Təlimdə BANM-in 16 müəllimi iştirak edib.

Sertifikatların təqdimolunma mərasimində Bakı Ali Neft Məktəbinin rektoru Elmar Qasımov İngilis dili və Humanitar fənlər Mərkəzinin Azərbaycanda ingilis dili hazırlığı üzrə ən böyük mərkəzlərdən biri olduğunu qeyd edərək Mərkəzin müəllimləri üçün keçirilən bu təlimin faydasından bəhs edib. Rektor “British Council” və BANM arasındakı əməkdaşlığa da toxunub və bildirib ki, ali təhsil müəssisəsi fəaliyyətə başladığı ilk illərdən “British Council” təşkilatı ilə əməkdaşlıq edir. O, bu əməkdaşlığın zamanla daha da gücləndiyini və ən yaxın tərəfdaşlardan biri, “Qızıl tərəfdaş” statusuna yüksəldiyini qeyd edib.

”British Council” təşkilatının Azərbaycan üzrə direktoru Nərgiz Hacıyeva və imtahanlar üzrə meneceri Nərgiz Əkbərova Bakı Ali Neft Məktəbi ilə səmərəli əməkdaşlıq həyata keçirildiyini və bu əməkdaşlığın faydalarından bəhs edib, əməkdaşlığın genişləndirilməsi imkanlarından danışıblar.

#BANM #BHOS #BritishCouncil #sertifikat