Xəbərlər
Bakı Ali Neft Məktəbinin MBA proqramına daxil olan iki bacı
”Sadəcə diplom deyil, həm də təhsil istəyirsənsə, BANM-i seç”
Fatimə Abbasova və bacısı Zəhra Abbasova 2022/2023-cü tədris ilində Biznesin idarə edilməsi (MBA) proqramı üzrə Bakı Ali Neft Məktəbinə (BANM) qəbul olunublar.
Fatimə 2022-ci ildə Azərbaycan Dövlət Dəniz Akademiyasının Gəmi sürücülüyü fakültəsinin Dəniz Naviqasiyası Mühəndisliyi ixtisasını Fərqlənmə diplomu ilə bitirib. Hazırda Dövlət Dəniz və Liman Agentliyinin Gəmi Hərəkətinin İdarəedilməsi Mərkəzinin Naviqasiya şöbəsində mütəxəssis kimi çalışır.
Fatimə bildirir ki, MBA təhsilini yalnız Azərbaycandakı ən yaxşı ali məktəbdə təhsilini davam etdirmək üçün deyil, həm də BANM ailəsinin bir üzvü olmaq üçün seçib: “Bakı Ali Neft Məktəbi haqqında olan düşüncələrim Ali Məktəbin tələbələri ilə münasibətimdə formalaşıb. Savadlı olmaqla yanaşı, dünyagörüşlü, kreativ, problemin həllinə yönümlü və aktivdirlər. Haqqında yüksək fikirdə olduğum tələbələrin hamısının BANM-də təhsil aldıqlarının şahidiyəm”.
Zəhra Abbasova isə 2015-cü ildə Bakı Slavyan Universitetinin (BSU) Beynəlxalq əlaqələr və Regionşünaslıq (Rusiya üzrə) ixtisasını bitirib. Hazırda bir neçə müəssisədə baş mühasib olaraq çalışır. Zəhranın MBA təhsilini BANM-də almağına səbəb bu Ali Məktəbin beynəlxalq əlaqələri və davamlı inkişafıdır: “BANM haqqında hər zaman yüksək fikirlər eşitmişəm. MBA təhsili almaq üçün ali məktəb seçimi zamanı eşitdiyim tək ifadə - “sadəcə diplom deyil, həm də təhsil istəyirsənsə, BANM-i seç” olub. Əgər üçüncü dəfə təhsil alsam, yenə də düşünmədən BANM-i seçərdim”.