Xəbərlər

             Azərbaycan Respublikası Prezidenti İlham Əliyev tərəfindən imzalanmış Sərəncama əsasən, 2019/2020-ci tədris ilində tələbə qəbulu imtahanlarında I ixtisas qrupu  üzrə ən yüksək nəticələr göstərmiş və Bakı Ali Neft Məktəbinə (BANM) daxil olmuş 23 Prezident təqaüdçüsündən biri də Üsyan Rzalıdır. O, 674.9 balla “Prosseslərin Avtomatlaşdırılması mühəndisliyi” ixtisasına qəbul olub. Şəmkir rayonu, Əhməd Cavad adına şəhər tam orta məktəbini bitirib.

 

• Üsyan , qəbul imtahanını necə xatırlayırsız?

 

Fikrimcə, builki qəbul imtahanları normal keçdi. Suallar içində asanı da, var idi, çətini də. Əksəriyyəti çox düşündürücü idi.  Fizika və riyaziyyat fənnlərindən 100% nəticə topladım.

 

• Seçdiyiniz ixtisasa həvəs necə yaranıb?

 

Müəllimlərim məni çox həvəsləndirirdi.  Onlar Bilavasitə məni bu ixtisasa yönəltdilər.

 

• Bakı Ali Neft Məktəbi haqqında haradan məlumat əldə etmişdiniz?

 

İnternetdən və sosial şəbəkələrdən araşdıraraq məlumatlar əldə etmişəm.

 

• Bəs yaxşı, niyə məhz BANM-i seçdiniz?

 

Azərbaycanda ən nüfuzlu və ən yüksək səviyyəli ali məktəbdir. Bura daha çox çalışaraq yüksək nəticələr əldə edən savadlı gənclərin hədəfidir.

 

• BANM-də sevdiyiniz ixtisasa qəbul olmaq üçün məqsədinizə necə çatdınız?

 

Müntəzəm və sistemli şəkildə çalışmaqla bu nəticəyə nail oldum.

 

• Ailənizin təhsilinizdə rolu haqqında nə demək istəyirsiz?

İxtisas seçimim tam müstəqil qərarımla olub. BANM-i seçməkdə ən böyük dəstəkçilərim valideynlərim olub. Onlar, seçimimə hər zaman hörmətlə yanaşaraq mənim yanımda oldular.

 

• Ən böyük arzunuz?

 

Ən böyük arzum xaricdə təhsilimi davam etdirməkdir.

 

• Hobbiləriniz nədir?

 

Hobbilərim çoxdur. Daha çox sevdiyim isə futbol və voleybol oynamaqdır.

 

• Hansı janrda kitablar oxuyursuz?

 

Dedektiv janrda kitabları çox sevirəm. Daha çox Çingiz Abdullayevin əsərlərini.

 

• Bakı Ali Neft Məktəbindəki təhsillə bağlı gələcək hədəfləriniz nədir?

 

BANM-dən mütəxəssis kimi məzun olaraq, mühəndislik sahəsində işləmək haqda da düşünürəm.