Xəbərlər

          Bakı Ali Neft Məktəbində (BANM) keçirilən ümumi yığıncaqda rektor Elmar Qasımov tərəfindən Ömürboyu təhsil fakültəsinin yeni təyin olunmuş dekanı dosent Kəklik Gözəlova kollektivə təqdim olunub. "Ömürboyu təhsil" anlayışı insanların həyat boyu davamlı olaraq yeni biliklərə yiyələnməsini nəzərdə tutur. Müasir təhsil sistemində “Ömürboyu təhsil” konsepsiyası orta məktəb və kollec şagirdləri, abituriyentlər, ali-orta ixtisas təhsil müəssisələrinin tələbələri, təqaüdçülər, ümumiyyətlə istənilən fərd üçün yeni biliklərin və təcrübənin qazanılmasında geniş istifadə olunur.

 

           Yığıncaqda həmçinin İngilis dili və humanitar fənlər mərkəzinin yeni təyin olunmuş müdiri Asif Qocayev və həmin mərkəzin müdir müavini Elmir Qurbanov kollektivə təqdim olunub.

 

            Tədbir çərçivəsində Elmar Qasımov Ümummilli lider Heydər Əliyevin anadan olmasının 96-cı ildönümünə həsr olunmuş IV SOCAR Beynəlxalq “Xəzər və Mərkəzi Asiya: Ticarət, Logistika, Neft emalı, Neft-kimya” Forumunun təşkilində xüsusi zəhməti olan BANM-ın Beynəlxalq əlaqələr şöbəsinin mütəxəssisi Rövşən Budaqova təşəkkürnamə təqdim edib.

 

             Xatırladaq ki, SOCAR-ın dəstəyi, Bakı Ali Neft Məktəbinin və Böyük Britaniyanın “Confidence Capital” şirkətinin təşkilatçılığı ilə Bakıda keçirilən Forumda dünyanın 20-dən artıq ölkəsindən müxtəlif şirkətləri təmsil edən 300-ə yaxın mütəxəssis iştirak edib.

 

             Eyni zamanda, toplantıda Ulu öndərin anadan olmasının 96-cı ildönümünə həsr olunmuş Tələbələrin Respublika elmi-texniki konfranslarının təşkilində xidmətlərinə görə Beynəlxalq əlaqələr şöbəsinin rəisi Könül Məhərrəmovaya, İctimaiyyətlə əlaqələr şöbəsinin böyük redaktoru Sahib Kazımova və Neft-qaz mühəndisliyi kafedrasının böyük laborantı İlahə Bayramovaya təşəkkür elan olunub.

 

              Rektor BANM-ın fəaliyyətinə verdikləri töhfələrə görə onlara təşəkkür ifadə edib və gələcək fəaliyyətlərində uğurlar arzulayıb.