Xəbərlər

     Bakı Ali Neft Məktəbinin (BANM) Nef-qaz mühəndisliyi kafedrasının mərhum dosenti Əzizağa Əzizovun “Proses mühəndisliyi və Mexanika üzrə Laboratoriya işləri” (“Laboratory Works on Process Engineering and Mechanics”) adlı kitabının təqdimat mərasimi keçirilib. Təqdimat mərasimində BANM-ın rektoru Elmar Qasımov, mərhumun qardaşı  Murad Əzizov, oğlu Azad Əzizov və digər ailə üzvləri, eləcə də Ali Məktəbin professor-müəllim heyəti və tələbələri iştirak ediblər.

      Tədbiri öz sözlərilə açan BANM-ın rektoru Elmar Qasımov Əzizağa Əzizovun Ali Məktəbin Neft-qaz mühəndisliyi kafedrasının quruculuğunda, dərs proqramlarının hazırlanmasında əvəzsiz rolundan danışıb, neftçi kadrların hazırlanmasında Azərbaycan dövlətinə böyük xidmət göstərdiyini qeyd edib.

       BANM-ın mühəndislik fakültəsinin dekanı Zəfər Qurbanov öz çıxışı zamanı Əzizağa Əzizovun həyat və yaradıcılığından, Neft-qaz mühəndisliyi kafedrasının professoru Fuad Vəliyev isə 20 ildən çox birlikdə çalışdığı dostu Əzizağa Əzizov haqqında öz xatirələrini paylaşıb.

       Qeyd edək ki, mərhum Əzizağa Əzizovun “Proses mühəndisliyi və Mexanika üzrə Laboratoriya işləri” kitabı artıq bütün tələbələrin və professor-müəllim heyətinin istifadəsinə verilib.