Xəbərlər

Bakı Ali Neft  Məktəbinin (BANM) rektoru  Elmar Qasımovun  dəvəti ilə Bolqarıstan Respublikasının Angel Kançev adına Ruse Universitetinin (AKRU) rektoru, professor Xristo İvanov Beloyevin rəhbərlik etdiyi nümayəndə heyəti BANM-də olub. Nümayəndə heyəti Bakı Ali Neft Məktəbinə səfərdən öncə Fəxri Xiyabanda Ulu öndər Heydər Əliyevin məzarını və Şəhidlər Xiyabanını ziyarət ediblər.

Sonra Bolqarıstanın Angel Kançev adına Ruse Universitetinin rektorunun rəhbərlik etdiyi nümayəndə heyəti, eyni zamanda Bolqarıstan Respublikasının Azərbaycan Respublikasındakı fövqəladə və səlahiyyətli səfiri Maya Xristova  BANM-in rəhbərliyi, professor-müəllim heyəti və tələbələri ilə görüş keçiriblər. Görüş çərçivəsində BANM və AKRU arasında əməkdaşlıq haqqında razılaşma imzalanıb.

Tədbiri açan Bakı Ali Neft  Məktəbinin rektoru Elmar Qasımov qonaqları salamlayıb və onları Ali Məktəbdə görməkdən məmnun olduğunu bildirib. Rektor Azərbaycanla Bolqarıstan arasındakı tarixi münasibətlərdən, BANM-in yaranma tarixi, fəaliyyəti, məqsədləri, xarici şirkət və universtitetlər ilə yaradılan əməkdaşlıqdan bəhs edib. BANM-in növbəti tərəfdaşı Ruse Universitetinin olacağını bildirən rektor imzalanan razılaşmanın  bakalavriat səviyyəsində mütəxəssis hazırlığında və qarşılıqlı maraq doğuran sahələrdə birgə elmi araşdırmaların aparılmasına imkan yaradacağını qeyd edib.

Bolqarıstanın səfiri Maya Xristova görüşə dəvət aldığı üçün BANM-in rəhbərliyinə təşəkkürünü bildirib. O, iki dost ölkənin universitetləri arasında əməkdaşlıq haqqında razılaşmanın əldə olunmasından şad olduğunu bildirib və bu əməkdaşlığın Azərbaycanın və Bolqarıstanın təhsil sahəsindəki ikitərəfli tərəfdaşlığının inkişafına təkan verəcəyinə əminlik ifadə edib.

Angel Kançev adına Ruse Universitetinin (AKRU) rektoru, professor Xristo İvanov Beloyev nümayəndə  heyətinin və öz adından Azərbaycanda və BANM-də olmaqdan məmnunluq ifadə edib və bu dəvət üçün rektor Elmar Qasımova  öz dərin təşəkkürünü bildirib.  O, rəhbərlik etdiyi ali təhsil ocağı haqqında təbdir iştirakçılarına geniş məlumat verib. AKRU-nun  avtonom dövlət ali məktəb olduğunu qeyd edən rektor, universitetdə 10.000 tələbə və doktorantın təhsil aldığını, universitetin iki filialının, 8 fakültəsinin və çoxsahəli mərkəzlərinin fəaliyyət göstərdiyini qeyd edib.

 Sonra BANM və AKRU arasında əməkdaşlıq haqqında razılaşmanın imzalanma mərasimi keçirilib. Əməkdaşlığın əsas məqsədi BANM-də “Proseslərin avtomatlaşdırılması mühəndisliyi” ixtisası üzrə yüksək ixtisaslı mütəxəssislərin hazırlanması üçün bakalavr hazırlığı proqramı çərçivəsində tədris olunacaq fənlərin materiallarının AKRU tərəfindən BANM-ə verilməsi, tədris prosesinin təşkilinə metodiki yardımın göstərilməsi, eləcə də  müxtəlif maliyyə mənbələri hesabına birgə elmi-tədqiqat işlərinin aparılmasını təmin etməkdir.

Sonda Bolqarıstanın Angel Kançev adına Ruse Universitetinin rektoru, prof. Xristo İvanov Beloyev BANM-in “Fəxri qonaq” diplomu ilə təltif olunub.