Xəbərlər

11 noyabr Azərbaycanda ilk dəfə təşkil olunan Bakı Elm Festival-2014 proqramının bir hissəsi Bakı Ali Neft Məktəbində keçirilib.

Festivalda BANM-in rəhbərlik, müəllim-professor, tələbə heyəti və ölkənin Ali təhsil müəssisələrinin professorları və peşəkar müəllimləri iştirak ediblər.

Festivalda ilk olaraq Azərbaycan Dövlət Neft Akademiyasının akademiki, tibb elmləri doktoru, professor Kərəm Şıxəliyev "Neft və neft məhsulları ilə çirklənmiş su səthlərinin təmizlənməsi vasitələri" mövzusunda təqdimatla çıxış edərək, polimerlərin və qeyri-üzvi maddələrin təkrar emalı, istismardan çıxmış polimerlərlərdən suni neftin alınma texnologiyası sahəsində əldə olunan elmi və praktik nailiyyətlər haqqında tədbir iştirakçılarını məlumatlandırdı.

Daha sonra Qafqaz Universitetinin Kimya fakültəsinin kafedra müdiri Yusif Abdullayev "Dəniz suyunda (hidrogen qarışığı) yeni daha ucuz və effektiv üsulla alınması" mövzusunda muəllim-professor heyətinin və tələbələrin qarşısında təqdimatla çıxış etdi. O, həmçin təqdimatda dəniz suyundan alternativ enerji mənbəyinin alınması üçün ixtira etdiyi qurğu haqqında əks olunan məlumatı iştirakçıların diqqətinə çatdırdı.

Festival çərçivəsində BANM-in fizika-riyaziyyat üzrə fəlsəfə doktoru Xanım Cəfərova "Mühəndislik ixtisasları üzrə riyaziyyatın müasir tədris metodikası" və BANM-in geologiya-mineralogiya üzrə fəlsəfə doktoru Oktay Rzayev "Naxçıvan-Araz tektonik zonasının geoloji quruluşu və struktur-tektonik xüsusiyyətləri" mövzularında təqdimatlarla çıxış etdilər.

Professor və müəllimlərin çıxışları tədbir iştirakçıları tərəfindən böyük maraqla dinlənildi və tələbələrin çoxsaylı sualları məruzəçilər tərəfindən cavablandırıldı.

Tədbiri aparan BANM-in elm və beynəlxalq əlaqələr üzrə prorektoru Ramiz Hümbətov Festivalın əsas məqsədi olan son illər ölkə alimlərinin dünyada qəbul olunmuş elmi texnologiya və innovativ nailiyyətlərini ictimaiyyətə və gənc nəslin nümayəndələrinə çatdırmaq missiyasının Bakı Ali Neft Məktəbində uğurla baş tutduğunu qeyd etmiş və tədbir iştirakçılarına, təşkilatçılara həyata keçirilən məhsuldar və əhəmiyyətli elm festivalının təşkilinə dəstək verdiklərinə görə dərin təşəkkürünü bildirdi.

Qeyd edək ki, Azərbaycanda ilk dəfə baş tutan Elm Festivalı Azərbaycan Milli Elmlər Akademiyasının (AMEA) təşkilatçılığı, Bakı Şəhər İcra Hakimiyyəti və Təhsil Nazirliyinin dəstəyi ilə müxtəlif təhsil ocağlarında həyata keçirilir. Məqsəd elm və cəmiyyəti, həmçinin elmin müxtəlif sahələrini bir-birinə yaxınlaşdırmaq, elmi nailiyyətləri nümayiş etdirmək, gənc nəslin bu sahəyə marağını artırmaqdır.