Xəbərlər

             Bakı Ali Neft Məktəbinin rektoru Elmar Qasımovun əmri ilə bərpaolunan enerji mühəndisliyi sahəsində müasir biliklərin yayılması və mütəxəssislər arasında informasiya mübadiləsinin təşkili məqsədilə daimi fəaliyyət göstərən “Bərpaolunan enerji: çağırışlar və perspektivlər” mövzusunda seminar təşkil olunub.

 

             Seminar Ali Məktəbdə fəaliyyət göstərən  Bərpaolunan enerji mühəndisliyi üzrə tədris və tədqiqat mərkəzi ilə sıx əlaqədə fəaliyyət göstərəcək və Azərbaycandakı və xaricdəki müvafiq profilli elm, təhsil və istehsalat müəssisələrinin mütəxəssislərini bir araya gətirən platforma rolunu oynayacaq.

 

              Bakı Ali Neft Məktəbinin rektorunun əmri ilə Neft-qaz mühəndisliyi kafedrasının professoru, fizika-riyaziyyat elmləri doktoru Siyavuş Azakov seminarın elmi rəhbəri təyin olunub.

 

              Seminarın iclasları onun işinə cəlb olunacaq mütəxəssislərin təklifləri və təqdim edəcəkləri məruzələrin mövzuları nəzərə alınmaqla təşkil olunacaq və orada təqdim edilən və müzakirəyə çıxarılan məsələlər ətrafında sərbəst və açıq diskussiya aparılması üçün hər cür şərait yaradılacaq.

 

              Bu iclaslarda Bərpaolunan enerji mənbələrindən istifadənin qanunvericilik əsaslarından başlayaraq, dünya təcrübəsi, Azərbaycan reallıqları, bu mənbələrdən istifadə üçün edilən texnika, texnologiya, materiallar, proqram təminatı, ekoloji və iqtisadi aspektlər kimi məsələlər müzakirəyə çıxarılacaq. Müasir enerjiqoruyucu texnologiyaların təbliğinə seminarın işində xüsusi diqqət yetiriləcək.

 

             Təşkilatçılar seminarın işində profilli strukturların və ayrı-ayrı mütəxəssislərin geniş iştirakında maraqlıdırlar. Buna nail olmaq üçün hazırda seminarın potensial iştirakçıları haqqında məlumatlar toplanılır, onların iclaslarda iştirak imkanları araşdırılır.

 

             Seminarın iclaslarında məruzəçi və ya dinləyici kimi iştirak etmək istəyənlərdən xahiş olunur özləri haqqında tam məlumatları (soyadı, adı, atasının adı, təhsili, elmi adı, elmi dərəcəsi, işlədiyi təşkilat, tutduğu vəzifə, hansı statusda seminarın işinə qoşulmaq istəyi, seminarın iclaslarının onun üçün məqbul olan vaxtı, elektron poçt ünvanı, iş və mobil telefon nömrələri) iyun ayının 20-dək aşağıdakı elektron poçt ünvanına göndərsinlər: azakov_s@hotmail.com