Xəbərlər

Bakı Ali Neft Məktəbinin tələbələri Azərbaycan Respublikasının Prezidenti yanında Gənclər Fondunun elan etdiyi 8-ci qrant müsabiqəsi haqqında ətraflı məlumatlandırıldılar. Tədbirdə Fondun Strateji planlaşdırma və beynəlxalq əlaqələr sektorunun baş məsləhətçisi Vüsalə Niftəliyeva məlumatlandırıcı və maarifləndirici təqdimatla çıxış etdi. Təqdimatda tələbələrə Gənclər Fondu tərəfindən elan olunan 8-ci qrant müsabiqəsi, müsabiqənin məqsədi, prioritet istiqamətləri, əhatə dairəsi və müsabiqədə 3 kategoriya üzrə layihələrin təqdim edilmə qaydaları və şərtləri haqqında geniş məlumat verildi. Təqdimatın sonunda Vüsalə Niftəliyeva tələbələri maraqlandıran sualları ətraflı cavablandırdı.

 

Qeyd edək ki, Azərbaycan Respublikasının Prezidenti yanında Gənclər Fondu gənclər təşkilatlarını və 16-29 yaş həddində olan fiziki şəxsləri 8-ci qrant müsabiqəsində iştirak etmək üçün “A”, “B” və “C” kateqoriyaları üzrə layihə təkliflərini təqdim etməyə dəvət edir. Müsabiqənin məqsədi gənc nəslin intellektual və mənəvi inkişafının təmin edilməsinə, ictimai fəallığının artırılmasına, innovativ ideyalarının və yaradıcı təşəbbüslərinin reallaşdırılmasına kömək etməkdir. Müsabiqəyə layihə təkliflərin qəbulu 15 yanvar 2016-ci il tarixinə qədər davam edəcək. Daha ətraflı məlumatı Fondun rəsmi veb-səhifəsindən əldə etmək mümkündür: http://youthfoundation.az/