Xəbərlər

Yeni tədris ilinin başlaması münasibətilə rektor Elmar Qasımovun təbriki

 Əziz tələbələr, müəllimlər, valideynlər,

2023/2024-cü tədris ilinin başlanması münasibətilə sizi ürəkdən təbrik edir, yeni dərs ilinin uğurlu olmasını arzulayıram.

Sevindirici haldır ki, SOCAR-ın Bakı Ali Neft Məktəbi bu tədris ilinə də yüksək göstərici ilə başlayır. Ötən tədris illərində olduğu kimi bu il də Ali Məktəbimizin qəbul yerləri tam dolub və ən yüksək bal toplayan bilikli, bacarıqlı abituriyentlər bizi seçiblər. Ən yüksək keçid balına görə Bakı Ali Neft Məktəbinin İnformasiya təhlükəsizliyi ixtisası bu il də liderdir. Ölkə üzrə ən yüksək keçid balı olan 4 ixtisasın 3-ü BANM-in ixtisasıdır.

Tələbələrimiz, məzunlarımız da əldə etdikləri uğurlarla bizi sevindiriblər. Ötən tədris ilində məzun olan tələbələrimizin əksəriyyəti işlə təmin olunub, bir qismi xarici ölkələrin nüfuzlu ali təhsil müəssisələrində təqaüdlə təhsil alırlar. Tələbələrimiz iştirak etdikləri beynəlxalq yarışlarda qalib olaraq ölkəmizi, Ali Məktəbimizi layiqincə təmsil edirlər. Qazanılan hər bir uğur bizi qürurlandırır.

Əziz tələbələr,

Sizi qarşıda yeni biliklər qazanacağınız maraqlı il gözləyir. İnanırıq ki, Ali Məktəbimizdə tədris olunan yüksək bilikləri əldə edərək peşəkar kadr kimi yetişəcək, uğurlarınızla bizi sevindirəcəksiniz.  Hər birinizə uğurlar arzulayırıq.

Dərin hörmətlə,

Elmar Qasımov