Xəbərlər

Bakı Ali Neft Məktəbində akademik Vaqif Abbasovun yubileyi keçirilib

Bakı Ali Neft Məktəbində (BANM) Akademik Yusif Məmmədəliyev adına Neft-Kimya Prosesləri İnstitutunun baş direktoru, akademik, AMEA-nın həqiqi üzvü, kimya elmləri doktoru Vaqif Abbasovun 70 illik yubileyi keçirilib.

Yubiley tədbirində SOCAR-ın rəsmiləri, tanınmış elm xadimləri, ictimaiyyət nümayəndələri, millət vəkilləri, akademikin ailə üzvləri, yaxın dostları və tələbələr iştirak ediblər.

Tədbiri giriş sözü ilə açan Bakı Ali Neft Məktəbinin rektoru Elmar Qasımov akademiki təbrik edib və bildirib ki, Vaqif Abbasov kimi böyük alimin yubileyinin məhz BANM-də keçirilməsi sevindiricidir: “Neft-Kimya Prosesləri İnstitutu ilə BANM arasında çox möhkəm əməkdaşlıq mövcuddur. Ali Məktəbimiz yaradılan gündən Vaqif Abbasov bizə xüsusi diqqət ayırıb, daim dəstək göstərib. Bizim tələbələrimiz və tədqiqatçılarımızın akademikin rəhbərlik etdiyi İnstitutun resurslarından faydalanması üçün daim şərait yaradılıb. Bütün bunlarda Vaqif müəllimin rolu əvəzsizdir. Belə böyük alimin, ziyalının, Azərbaycan elminə böyük töhfələr vermiş akademikin Ali Məktəbimizin fəaliyyətinə, tədqiqatçılara, tələbələrə diqqəti bizim üçün böyük fəxrdir”.

Sonra Elmar Qasımov BANM-in Elmi Şurasının qərarı ilə Bakı Ali Neft Məktəbinin Fəxri alimi” diplomunu akademikə təqdim edib.

Çıxış edən AMEA-nın prezidenti İsa Həbibbəyli Vaqif Abbasovun neft kimyası sahəsindəki böyük xidmətlərindən, bu sahənin inkişafına verdiyi töhfələrdən bəhs edib. O bildirib ki, Vaqif Abbasovun kimya sahasindəki ixtiraları müxtəlif istehsalat müəssisələrində istifadə olunur və dünyanın bir çox ölkəsində istehsalat təcrübələrində özünü təsdiq edib.

AMEA-nın prezidenti İsa Həbibbəyli Vaqif Abbasova Yusif Məmmədəliyev adına döş nişanı və vəsiqəni təqdim edib.

Çıxış edən millət vəkilləri Sadiq Qurbanov, Etibar Əliyev, xalq yazıçısı Çingiz Abdullayev, akademiklər Misir Mərdanov, Abel Məhərrəmov, Azərbaycan Dövlət Aqrar Universitetinin rektoru vəzifəsini icra edən Zəfər Qurbanov, Təhsil İnstitutunun direktoru, akademikin tələbəsi Rüfət Əzizov, SOCAR-ın Təlim, Tədris və Sertifikatlaşdırma İdarəsinin rəisi Fuad Süleymanov, akademikin dostları onu təbrik ediblər. Onlar Vaqif Abbasovun Azərbaycan elminin zənginləşməsində rolundan, sənayenin daha səmərəli fəaliyyətinə qatqı verən çoxsaylı tədqiqatlarından, publilistik fəaliyyətindən, xeyriyyəçilik xidmətlərindən, gənclərə dəstəyindən bəhs edib, xatirələrini bölüşüblər.

70 illik yubileyini qeyd edən akademik Vaqif Abbasov çıxış edərək hər kəsə dərin təşəkkürünü bildirib. O qeyd edib ki, həyatını elmə, tədqiqata və gənclərin mütəxəssis kimi yetişməsinə həsr edib. Akademik yetişdirdiyi tələbələrin elmi nailiyyətlər əldə etməsi, müxtəlif vəzifələrdə peşəkar mütəxəssis kimi fəaliyyət göstərməsindən böyük fəxr və qürur hissi keçirdiyini vurğulayıb. Vaqif Abbasov bildirib ki, alim və müəllim kimi müqəddəs missiyasını ömrünün sonuna qədər davam etdirəcək.

#BANM #BHOS #yubiley #Akademik