Xəbərlər

         Azərbaycan Respublikası Prezidenti İlham Əliyev tərəfindən imzalanmış Sərəncama əsasən, 2019/2020-ci tədris ilində tələbə qəbulu imtahanlarında I ixtisas qrupu  üzrə ən yüksək nəticələr göstərmiş və Bakı Ali Neft Məktəbinə (BANM) daxil olmuş 23 Prezident təqaüdçüsündən biri də Əsmər Şıxəmirlidir. O, 675 balla “İnformasiya təhlükəsizliyi” ixtisasına qəbul olub.

 

         Əsmər Şıxəmirli  2002-ci Qax rayonunun Ləkit kəndində anadan olub. O, 2008-2019-cu illərdə Qax rayonu, Tofiq İsmayılov adına  5 saylı tam orta məktəbdə təhsil alıb.

 

• Qəbul imtahanını necə xatırlayırsınız?

Qəbul imtahanına 3 il intensiv hazırlaşdım, əvvəlcə hər şey yaxşı idi, həlledici  imtahanlarda həyəcanlı oldum və səhvlər elədim. Yaxınlarım məndən 700 bal gözləyirdi, ancaq 675 balla istədiyim ixtisasa qəbul oldum.

 

• Seçdiyiniz ixtisasa həvəs necə yaranıb?

11-ci sinfə qədər ixtisas seçimim yox idi, sadəcə I qrup üzrə hazırlaşırdım. Daha sonra araşdırmağa başladım, ən çox informasiya təhlükəsizliyi sahəsini özümə uyğun gördüm, bu ixtisasda oxuyan uşaqlardan da əldə etdiyim məlumatlarda önəmli sahə olduğu qənaətinə gəldim.

 

• Bəs, Bakı Ali Neft Məktəbi haqqında haradan məlumat əldə etmisiniz?

BANM haqqında ilk dəfə anamdan eşitmişəm. Daha sonra özüm də BANM-in saytı, Facebook səhifəsini incələyib xeyli informasiya toplamışdım.

 

• Niyə məhz BANM-i seçdiniz?

Açığı, əvvəlcə xaricdə oxumaq istəyirdim. Daha sonra BANM haqqında eşidəndən sonra araşdırma elədim və öz sahəmə uyğun BANM-də ingiliscə yaxşı təhsil haqqında, eləcə də yaxşı iş imkanları barədə məlumat əldə edəndən sonra sənədlərimi BANM-ə verdim.  

 

• BANM-də oxumaq hədəfinizə necə çatdınız?

Kifayət qədər savadlı uşaqlar BANM-ə sənəd verməyə hazırlaşırdı, kifayət qədər güclü rəqiblərim vardı,  çalışmaqdan başqa heç nəyə güvənmirdim. Ona görə də hədəfimə çatmaq üçün dərs oxumağa yetərincə zaman ayırırdım.

 

• Ailənizin təhsilinizdə rolu haqqında nə demək istəyirsiz?

Ailəmdən həmişə dəstək görmüşəm: həm ixtisas seçimi zamanı məsləhətlər veriblər, həm imtahanlara hazırlaşanda hər zaman yanımda olublar.

 

• Ən böyük arzunuz?

Ən böyük arzum yoxdur, hədəflərim var. Hədəflərimdən biri təhsilimi bitirəndən sonra özümü rahat bir ortamda işə başlamaqdır.

 

• Hobbiləriniz nədir? 

Hobbilər çoxdur, ən əsası, kitab oxumaqdır.

 

• Hansı janrda kitablar oxuyursunuz?  

Əsasən fantastik, detektiv janrlarına, bədii ədəbiyyatla bağlı  kitablara üstünlük verirəm.

 

• BANM-dəki təhsillə bağlı gələcək hədəfləriniz nədir?

Hələlik əsas hədəfim ixtisasımla bağlı dərslərimi yaxşı oxumaq və öz sahəmin ən yaxşısı olmaq üçün dayanmadan çalışmaqdır.