Xəbərlər

             Bakı Ali Neft Məktəbinin (BANM) və Böyük Britaniyanın “TwentyEighty Strategy Execution”(STRATEX) şirkətininbirgə təşkilatçılığı ilə baş tutan və  ABŞ-ın Corc Vaşinqton Universitetinin magistr proqramı əsasında tədris edilən Layihə İdarəetmə Məktəbinin (SPM) Məzun Günü keçirilib.

 

             Layihə İdarəetmə Məktəbini bu dəfə 20-dən çox müəssisənin 40 mütəxəssisi bitirib. Məzunlar arasında SOCAR, BP, ABB, “PAŞA Holdinq”,“Gilan Holdinq”, Bank Respublika, Bakı Beynəlxalq Dəniz Ticarət Limanı ASC, “Azərbaycan Dəmir Yolları” QSC, Dövlət Miqrasiya Xidməti, "Azerikimya" İB, "Cənub Qaz Coridor" QSC,  “Gilan Construction Group” MMC, “AS Qrup İnvestment” MMC, “Gilan Real Estate Management”, “DeGolyer and MacNaughton Corp”, "6-cı Mərtəbə",“TP Engineering”, “Caspian Innovation Center”, “Oracle Corporation Azerbaijan”, “PDL” kimi şirkət və müəssisələrin rəhbər işçiləri və məsul əməkdaşları var.

 

              Ali Məktəbin rektoru Elmar Qasımov çıxışında Layihə İdarəetmə Məktəbinin məzunlarını proqramı uğurla başa vurmaları münasibətilə təbrik edib. Rektor Layihə İdarəetmə Məktəbinin beynəlxalq səviyyəli mütəxəssislər yetişdirməkdə əhəmiyyətli rolunu xüsusi olaraq vurğulayıb.

 

               “Artıq 4 ildir ki, Bakı Ali Neft Məktəbində reallaşdırılan Layihə İdarəetmə Məktəbinin məzunlarının bir çoxu proqamı bitirdikdən sonra karyeralarında mühüm irəliləyişlər əldə ediblər” - deyə E.Qasımov qeyd edib.

 

                 Ekologiya və Təbii Sərvətlər Nazirinin müavini Firdovsi Əliyev, Gənclər və İdman Nazirinin müavini İsmayıl İsmayılov çıxışlarında SPM-in  Azərbaycan üçün çox önəmli məktəb olmasından, yerli insan resurslarına və ümumilikdə, layihələrin idarə edilməsi üzrə bacarıqların inkişafına verəcəyi töhfədən bəhs ediblər. Natiqlər gənc mütəxəssislərin inkişafı, korporativ biznes mühitinə inteqrasiyası və praktiki səriştələrinin artırılması baxımından bu cür layihələrin əhəmiyyətini vurğulayıblar.

 

                   Daha sonra məzunlar çıxış edərək, Layihə İdarəetmə Məktəbi çərçivəsində əldə etdikləri yeni biliklərin onların peşəkarlıqlarının yüksəlməsinə ciddi praktiki töhfələr verdiyini bildiriblər.

 

                    Sonda məzunlara ABŞ-ın Corc Vaşinqton Universitetinin  Magistr sertifikatı təqdim edilib.     

 

                    Qeyd edək ki, son illər ərzində dövlət və özəl sektorda fəaliyyət göstərən şirkətlər Layihələri İdarəetmə Məktəbinə böyük maraq göstərərək, öz əməkdaşlarının ixtisasartırması baxımından onların bu layihədə iştirakına üstünlük verirlər.

 

                     Məktəbdə  Layihələrin İdarə olunmasının 7 modulu üzrə ABŞ-ın Corc Vaşinqton Universitetinin Magistr Proqramı əsasında təlim keçirilir. Həmin modullara “Layihələrin idarə edilməsi”, “Layihəyə rəhbərlik”, “İdarəetmə və kommunikasiya”, “Risklərin idarə edilməsi”, ”Qrafik və xərclərə nəzarət”, “Layihə menecerləri üçün keyfiyyət”, “Layihənin idarə edilməsinin tətbiqi mexanizmləri”, “Layihələri idarəetmə mütəxəssisi (PMP) imtahanına hazırlıq”, “Layihə menecerləri üçün danışıqların aparılması bacarıqları” kimi kurslar daxildir.